نصيحة للعرسان الجداد



لو لقيت " طقم مشابك " مكتوب فى القايمة .. متمضيش ????
ايوة متمضيش .. و اعرف ان الناس دول مش ناويين على الخير
( احنا فتحنا الموضوع دا بناءاً على رسالة صديقنا و استفساره )

اعرف ايه اللى يتكتب و ايه اللى ميتكتبش ????
كتير من الستات بتحب تفخم قايمة بنتها عشان تتباهى بيها و تكون اغلى من قايمة بنت خالتها ولا من زمايلها و شكلها قدام الجيران ...
لدرجة انها بتكتب اطقم المشابك و احبال الغسيل !!! .. و هل دا ينفع برضو ؟؟


- بالنسبة للذهب و المجوهرات
اللى بيتكتب هو ذهب العروسة اللى كان معاها و خارجة بيه ..بتاعها يعنى
طبعا بيتكتب بالجرامات .. انما شبكتك انت متكتبهاش ..فى الاول و الاخر دى هدية العريس و ممكن بعد الجواز تبيعها و تجيب تكييف فى شقتك مثلاً ..

- بالنسبة للعفش و الاجهزة
كل الاجهزة الكهربائية من اول الغسالة و الثلاجة لحد مكنة النسكافيه بيتكتبوا
و الاطقم الخشب ( انتريه - صالون - غرف نوم و سفرة ) .. انما السجاد مبيتكتبش ..
ايوة فعلا السجاد مش بيتكتب لانه حاجة مستهلكة على المدى القريب .. ممكن يتنسر ..ممكن تقع فحمة عليه تشيطه .. ممكن يدوب من كتر الغسيل .. فهمت .انت مش هتعد بسجادة واحدة طول العمر


- فى المطبخ
الصينى مبيتكتبش .. اطقم البايركس اللى مدفوع فيها الشئ الفلانى مبيتكتش .
اى حاجة معرضة للكسر و التلف مبتتكتبش .. انما الشوكة و المعلقة بتتكتب ..لانها ادوات معمرة و حديد .. انا امى عندها معالق موجودة بقالها 36 سنة جواز اهه و محصلهاش حاجة

- النيش ملهوش لازمة و كلنا كرجالة مقتنعين بكدة طبعا ???? 


الخلاصة : اى حاجة معرضة للكسر و التلف فى وقت قصير جدا جدا مبتتكتبش زى الزجاج و المشابك و الميكب طبعا



و دى شوية نصايح ليك و انت بتمضى القايمة عشان متورطش نفسك ::


1- ما تمضيش الا اذا اتأكد من وجود المنقولات المذكورة بالقايمة على الطبيعة ولو مفيش حاجة موجودة و مكتوبة متمضيش .
2- لازم توصف المنقولات وصف تفصيلى عشان تتميز عن غيرها لو فيه "منازعة"، ذكر أوصافها الأساسية زى الألوان والنوع والحجم والشكل والسعر .
3- لابد من توقيع الزوج بكتابة اسمه بالكامل بخط واضح ومش فورمة .
4- على الزوج التوقيع على كل ورقة عشان ما يتمش تبديل أي ورقة من الأوراق.
5- خلى بالك لازم ميكونش فى أي كشط أو إضافة أو تحشير وما تسبش مسافات كبيرة بين الأسطر .
6- خد نسخة من القايمة ضمانا لعدم التلاعب فيها .