جامعات كتيره فى العالم دلوقتى تكاليف الدراسه فيها مكلفه جدا وعشان تروح تاخد ماجيستير او اى شهاده علميه فى جامعه بره مصر هتصرف كتير اوى .. بس انهارده هانقولكم على كام دوله تعتبر تكاليف الدراسه فيها رخيصه .. طيب زى ايه ؟؟

اليونان


الطلاب الاجانب من جوه الاتحاد الاوربى بيقدروا يتعلموا فى جامعات اليونان بشكل مجانى انما لو من بره الاتحاد الاوربى هيكون متوسط التكلفه 1800 دولار فى السنه .. وبتمتاز اليونان بأن تكلفه المعيشه فيها منخفضه يعنى مش هتحتاج لمصاريف كتير فى وقت الدراسه

دول شمال اوربا

زى النرويج والدنمارك والسويد وايسلندا
النرويج مثلا الدراسه فيها للنرويجين والاجانب مجانيه بس الشرط الموجود هنا ان يكون تدريس البكالوريوس باللغه النرويجيه وبتشترط الجامعات اختبارات للغه قبل الدراسه عشان تتأكد من اجادتك للغه النرويجيه انما الماجيستير والدكتوراه ممكن تدرسهم بالانجليزى
وايسلندا برده تقدر تسجل فى اى جامعه حكوميه برسوم 425 دولار
الدنمارك بقه رسوم الماجيستير والدكتوراه بتكون فى حدود 7 الاف دولار – 19 الف دولار فى السنه
والسويد من 9700دولار – 17 الف دولار فى السنه

اسبانيا 

الرسوم مش مكلفه لو هتتعلم فى جامعه حكومية هتكون مابين 1000-2500 دولار سنويا وفيه مميزات كتير تقدر تاخدها من البنوك زى قروض دراسيه

المانيا


تقريبا مافيش رسوم دراسيه فى معظم الجامعات الحكوميه فى المانيا والرسوم رمزيه مش هتزيد عن 350 دولار يعنى 6 الاف جنيه تقريبا والكلام دا على اى المانى او اى مغترب
ماعدا ولايه اسمها " بادن فورتيمبرج " دى تكاليف الدراسه تقريبا 3 الاف دولار

فرنسا


فرنسا زيها زى المانيا برده الدراسه فى الجامعات الحكوميه رخيصه ومش هتعدى 250 دولار مش كده وبس أغلب الجامعات لو هتدرس باللغه الفرنسيه ممكن تكون الدراسه مجانيه

ايطاليا


الجامعات الخاصه معروفه ان الدراسه فيها غاليه جدا انما لو جامعه حكوميه فهتكون ارخص وتقريبا تكلفه الدراسه فى السنه هتكون فى حدود 1300 دولار .
المشكله الوحيده للطلاب العرب بشكل عام ان عشان تاخد فيزا للدراسه فى الدول دى بتاخد اجراءات وورق كتير بس برده من وقت للتانى فيه جامعات كتير بتقدر منح دراسيه بس نرجع ونقول ان اهم حاجه هيا اللغه

fff