بيبقولك فيه دراسة إنجليزية أقرت إن بعض الرجال فى العالم ممكن أنهم يحتفظوا بملابسهم الداخلية لمدة 7 سنين متواصلة !


أه والله 7 سنين حتى لو تآكلت أو اتخرمت لامؤاخذة أو أصبحت غير صالحة للإستعمال فممكن ساعتها  ميلبسوهاش فى المشاوير اللى برة البيت ويفضلوا محتفظين بيها تحت لبس البيت برضو !

يمكن كتير من الرجالة معندهمش حتة الإهتمام باللبس الداخلي واهو اى فانلة حمالات على اى بوكسر مغسولين بيتلبسوا وخلاص .. هو ده كمان هنفكر فيه ؟!





الحقيقة آه لازم تفكر فيه ... كام مرة جه فى بالك ان ممكن يحصل اى حاجة فى الشارع وتضطر ساعتها للتخلي عن قميصك اللى ممكن يتقطع مثلاً او يقع عليه حاجة فتقلعه تغسله وتفضل بفانلتك الحمالات المقطعة أو المهلهلة !  متخيل منظرك ؟

طيب متخيل انك لو لابس بنطلون واسع شوية واضطريت توطي او تركب مواصلات وظهر البوكسر وفيه خرم او الاستيك بتاعه فاكك !

رجالة كتير بتكون لابسة أشيك قمصان وأغلي بنطلونات وميهتموش بالداخلي أبداً لأنه مش هيظهر للناس مع إن على العكس تماماً ... مظهرك بيبتدى من الداخل يا صديقي !




ودي شوية نصايح كده ليها علاقة باللبس الداخلي :

1-      متدخلش الفانلة جوة البوكسر  ... كمية كلكعه مش طبيعية هتحصل !

2-      متختارش فانلة طويلة أووى ... كدة الكلكعة هتبقا للركب !

3-      متلبسش بوكسر واسع أوى فبرضو يكلكع .. ولا ضيق أوى فحيواناتك المنوية تنقرض !

4-      لو هتلبس بنطلون خفيف أو قماش بلاش تلبس تحتيه بوكسر قماش علشان هيبقا باين وشكله مش لطيف .. إلبس قطن او حرير

5-      إبعد على قد متقدر عن الألوان الفاتحة لأن البقع والإصفرار هيبوظها ويخلي شكلها مش ولابد

6-      مينفعش تلبس بوكسر مشجر غير فى المصيف صدقني .. غير كدة شكلك هيبقا مشجر ع الآخر

7-      لما تروح الجيم أو تلعب كورة أو رياضة تانية البس بوكسر قطن علشان يمتص العرق ...اى نوع تانى بيطلع ريحة !

8-      حاول تغسل الملابس الداخلية بمياه باردة ...المياه السخنة بتخلى الأنسجة تتآمل وتتمدد وبيبقا شكله مبهدل غسلة بعد غسلة