سؤال مهم لكل الناس الخاطبين او المقبلين على الخطوبة .. تروح لخطيبتك كل قد ايه ؟ والمفروض اخد معايا حاجه حلوه كل قد ايه  ؟ اعرف شباب بيرحوا لخطيبتهم كل ماتهب رياح الشوق وناس تانيه ممكن مابيدخلوش بيت خاطيباتهم الا كل سنه مره .. لا دا صح ولا دا صح بس المفروض

الموضوع يكون له اصول عشان اهلها يحبوك

و فيه هنا أكتر من نموذج ..


النموذج الخطيب المقيم  



ودا اللى بيعتبر بيت خطيبته كأنه بيت خالته داخل طالع عليهم ولو الخطوبه طولت شويتين مش بعيده هتلاقى ليه اوضه هناك بيبات فيها كمان . . وده فى الاغلب يا اما اهل بيت خطيبته هيكونوا مرحبين به اوى وحبوبين وقعدتهم حلوه يا اما انت اللى جاى على الناس دى وممكن مايكنوش طايقينك ومستحملينك بالعافيه .. بس دا لازم تحسه وبتتعرف من حاجات كتير .. هل هما بيرحبوا بيك كويس .. يعنى كل ماتبتدخل بتلاقى جيلى وجاتوه وسندوتشات وكدا ولا هيا كوبايه الشاى بس !!


نموذج الخطيب الطفشان



ودول اللى بيروحوا لخطيبتهم اكنهم رايحين للحلاق اللى هو كل شهرين مره كدا تأديه واجب مش اكتر .. ودول يا أما هو مقضيها بره وبيخرج مع خطيبته يا اما بيتخنق من اهل خطيبته وطفشان منهم عشان كل مايروح يفضلوا مستلمينه بقه اسئله " اشتريت الشقه ؟ " " شطبت الشقه " " حجزت القاعه " ... الى اخر الاسئله الرخمه دى اللى تخليك فعلا تتقفل اصلا من خطيبتك

النموذج الخطيب الوسطى


ودى المدرسه الوسطيه اللى هو يابخت من زار وخفف ودا اللى انصحك تقلدهم يامعلم يعنى اللى هو كل اسبوع زياره وممكن تفوت اسبوع وتخليها كل اسبوعين عادى وزيارتك تكون ساعتين تلاته مش شرط تروح من بعد الضهر وتفضل لغايه 2 بالليل
وفى كل الاحوال ماينفعشى تعدى شهر من غير ماتكون اخدت حاجه حلوه معاك فى ايدك يعنى يا اما تورتايه او طبق حلويات شرقى او علبه جاتوه كدا يعنى... دا غير ان ممكن تجيب لخطيبتك حاجات صغيره تكون هيا بتحبها .