الراجل المتجوز يعينى بقه مسكين من كتر المسؤليات اللى عليه وضغوط الحياة مابقاش فيه حاجات كتير تسعده .. بعكس الراجل اللى لسه ماتجوزشى فدا حر طليق وحاجات كتير ممكن تسعده ..
وفيه خمس حاجات هتلاقى كل الرجاله المتجوزة بتسعدهم ممكن تكون حاجات تافهه بس بتفرق معاهم اوى

الاولى
انه يشترى بامبرز عليه عرض

ايوه دايما تفكيرنا ان البامبرز دا مصروف مالوش اى لازمه ومش لازم اجيب اغلى انواع البامبرز يعنى .. ولو رجعت لمراتك وقولتلها نجيب النوع الفلانى عشان ارخص .. تقولك لا لا .. ده هيسلخ البيبى !!! هو احنا على ايامنا كان فيه بامبرز اصلا !!؟ ... عشان كدا بنبقى فى اسعد لحظات حياتنا لما ننزل الماركت ونلاقى نوع البامبرز اللى انت بتجيبه عليه عرض

التانيه
انك تهرب من السايس

بقه موضوع مستفز جدا على كل رصيف وقدام كل محل مش هقول لما تركن لا دا انت لو نازل تشترى حاجه مجرد ماوقفت بالعربيه تلاقى اللى رافعلك المساحات وهاتك توسيخ فى العربيه بالفوطه القذره بتاعته .. وطبعا الفكه 2 و 3 جنيه دى مابقتش تنفع معاهم , وعشان كدا لو رجعنا ومالقناش السايس وقدرت تركب وتجرى بعربيتك هتلاقى الموضوع ده سببلك سعاده رهيبة

التالته
انك تودى مراتك لأهلها

ياسلام وترجع البيت تلاقيه هادى وتلاقى نفسك متسكنيص وبدأت تعمل الحاجات اللى انت مش عارف تعملها .. سواء بقه تمسك كتاب تقراه او تشتغل او حتى تحلق دقنك برواقه

الرابعه
انك تنام

النوم سلطان ياجماعه وخاصه لو بعد شغل وتعب .. لما تيجى تحط دماغك على السرير وتلاقى نفسك فى ثانيه نمت وبدرى هتصحى تلاقى نفسك مبسوط

الخامسه
انك تصحى من النوم تلاقى بكره اجازه .. ياسلاااام وبعد ماتقوم من النوم تدخل برده تانى تكمل نوم


على الرغم انها ممكن تكون حاجات بسيطه بس دى فعلا اهم 5 حاجات فى حياه اى راجل متجوز .. ياترى عندك حاجه تانيه غيرهم ؟

bigsmile bigsmile lsan bigsmile