AD DESCRIPTION
AD DESCRIPTION
AD DESCRIPTION

AD DESCRIPTION


شاطر
استعرض الموضوع السابقاذهب الى الأسفلاستعرض الموضوع التالي
avatar
ريان
مشرف عام
مشرف عام
البلد : القاهرة
عدد المساهمات : 102
التقييم : 3
تاريخ التسجيل : 22/07/2012

حوار الجيش من طأطأ لسلامو عليكم بالتفصيل

في الخميس 30 أكتوبر 2014, 10:26 pm




الموضوع ده حبيت أجمعهلكم في مكان واحد لأنه مفيد جدا جدا
وناس كتير ممكن تستفاد منه
وإن شاء الله الموضوع هايبقي متجدد

كيفية إستخراج المستندات المطلوبة للتجنيد
المشاركه دي مهمة جداً وللأسف نسيت أحطها في الأول
-------------------------------------------------------------------------------------------------------------------


الفيش الجنائي
حتروح القسم اللي انت تابع ليه وحتقول للمخبر اللي بيبقى واقف على الباب انك عايز تعمل فيش جنائي حيقوم هو قايلك روح المكان الفولاني وحتاخد استماره الفيش الجنائي ب 4 جنيه او 6 جنيه لو مستعجل
وطبعا مش حتكتب فيها حاجه لكن حتروح في مكان تاني وتقف طابور وتستنى دورك لحد ما تدخل للشخص المسؤول وحتديله ورقه الفيش الجنائي متدبس فيها صورة شخصيه ليك مكتوب عليها اسمك من ورا وبردك متدبس في نفس الفيش صورة من البطاقه الشخصيه
وحتقوله انك عايزها عشان التجنيد وحيخليك تبصم بكل صوابعك وتستلم الفيش بعدها بيومين تقربيا
المهم تكونوا جايبن البطاقه + صورة من البطاقه + صورة شخصيه + قلم جاف تكتبوا بيه اسمكم على الصورة من ورا + دباسه تكونوا مدبسين فيها الصورة في المكان المخصص جوه ورقه الفيش الجنائي وتدبسوا صوره البطاقه ورا الفيش من فوق
حييجي راجل ياخد من كل 5 البطاقه ويقولكم تعالوا معاه عشان تدخلوا جوه
بعد كده حينادوا بالاسم على كل واحد وحتلاقي راجل لطيف حيسألك الفيش الجنائي عايزه عشان ايه حتقوم انت رادد بقوه وتقولوه عشان الجيش وبعد كده حيبصمك بكل الصوابع على الفيش
ويا ريت تسيبلوه ايدك خالص عشان ميتنرفزش عشان هو عصبي حبتين D:
وبس بعد ما ايدك اتلوثت بالحبر القذر مبروك انت كده خلصت وحتروح و ممكن اي حد من اهلك يستلمهولك بالبطاقه بتاعته وبتاعتك وخلاص

ملحوظة مهمه :
مدة صلاحية الفيش الجنائي هي 3 شهور من تاريخ إصداره

-------------------------------------------------------------------------------------------------------------------


القيد العائلي
نقاط مهمه بس لازم اوضحها :
القيد العائلي بيتعمل في السجل المدني اللي انت تابع له بمعنى ادق انه حسب البطاقه
القيد العائلي اللي انت بتعمله بيكون باسم والدك باعتباره هو رب الاسره بمعنى ان صاحب القيد العائلي هو الوالد بينما طالب القيد العائلي هو انت ( انا بقول كده عشان مثلا حتلاقوا في البيانات المطلوبه اسم الوالده بكده هو يقصد تكتب اسم ام والدك اي اسم جدتك من ناحيه والدك فاهمني ؟ يعني مش تكتبوا اسم والدتك لكن الصح ساعتها انك تكتب اسم جدتك )
القيد العائلي نظرا لأنه بيتعمل في السجل المدني فهو بيبقى زحمه جداااااااا وقت اجراءات التجنيد فلازم لمصلحتكم تيجوا بدري اوي عشان تكونوا عملتوا اللي كنتم عايزين تعملوه احسن من انك تيجي متأخر وتقف في طابور طوييييييييييييل عريض وبعدين يقولولكم اوبس الوقت خلص تعالى بكرة صح؟
والقيد العائلي مفيهوش نظام انك تدفع وتخلص بدري لأ لكن للاسف فيه نظام الوسايط بس قمه العدل D:

الاوراق المطلوبه لعمل القيد العائلي :
1- نموذج 40 من البوسطه وده انت حتملاه او ممكن تستسهل وتخللي واحد من اللي بيبقوا موجودين قدام السجل من الكتيبه تدفعلوا 5 جنيه وهو حيكتب كل حاجه ويدبسلك كل الاوراق المطلوبه
2- صور بطاقتك وصور بطايق العائله كلها ( الاب والام والاخوات والاخوه )ولو في حد في عائلتك لسه مطلعش بطاقه ساعتها حتضطر للاسف انك تعمله شهاده ميلاد كمبيوتر عشان هما بيحتاجوا يعرفوا الرقم القومي للاسف
3- صوره قسيمه الزواج او الطلاق بتاعه والدك ووالدتك ويا ريت تجيب الاصل عشان المفروض الموظفه بتبص على الاصل وتتأكد منه وترجعهولك تاني

بعد اسبوع تقريبا من تقديمك لنموذج 40 ( وطبعا بعدها الموظفه اعطتك وصل ) حتروح تاني السجل المدني ومعاك الوصل ويفضل لو معاك كمان صورة بطاقه الوالد ( حقولكم ليه بعد شويه ) وبعد كده نفس الموظفه حتديها الوصل وهي حتديك القيد العائلي بس خلي بالك لأن القيد العائلي ده مش هو الصورة النهائيه
بمعنى ادق مش هو ده القيد العائلي اللي بالكمبيوتر بل هو يعتبر زي حاجه اوليه للقيد العائلي
والقيد العائلي اللي انت استلمته ده بتراجعه على جنب ( ولازم تراجعه كويس جدا عشان الحوار ده مفيهوش هزار ) فخللي بالك وراجع البيانات كويس عشان لو فيه اي حاجه غلط ساعتها ( وان شاء الله ميكونش فيه ) حتديه تاني للموظفه عشان تظبطه تمام
المهم بعد ما انت استلمت القيد العائلي وراجعته حتقوم كاتب اقرار بسيط على القيد العائلي ده تقر فيه ان البيانات كلها صحيحه
والاقرار حيبقى بسيط اوي بالشكل ده :
اقر انا فلان ان البيانات كلها صحيحه وحتمضي كمان ويبقى عملت الاقرار
وبعدين بعد ما استلمت القيد العائلي وعملت الاقرار حتقولك الموظفه عند الموظفه الفولانيه في الشباك الفولاني وحتدفع 10 جنيه ونصف وحتديها القيد ده
والمفروض اساسا ان القيد ده هما مدبسين فيه صورة بطاقه والدك اللي كنت مقدمها مع نموذج 40 زمان لكن ممكن صورة البطاقه تتفك من الدبوس وتضيع ساعتها هاتضطر تروح تاني تجيب صورة من بطاقة والدك وبالتالي ريحوا دماغكم انتم وجيبوا صورة البطاقه احتياطي لعل وعسى
بعد كده الموظفه حتقولك تعالى بكرة وانت حتجيلهم بكرة ان شاء الله ومعاك بطاقتك الشخصيه طبعا وحتستلم اخيرا القيد العائلي الكمبيوتر
وبكده تبقى خلصت اجراء سخيف من اجراءات التجنيد والتعبئه
( وعلى فكرة القيد العائلي للاسف له مده صلاحيه مش عارف بالضبط اد ايه بس بأي حال من الاحوال مش ازيد من سنه )

-------------------------------------------------------------------------------------------------------------------



كده معدتش إلا شهادة الميلاد الكمبيوتر ومتهيألي الموضوع سهل من أقرب سجل مدني ليك وبتاخدها وأنت واقف

-------------------------------------------------------------------------------------------------------------------
ندخل فى اجراءات التجنيد

أولا : طريقه احتساب الوزن الزائد في الكشف الطبي في التجنيد
كيفيه حساب الوزن الزائد في الكشف الطبي تتم كالتالي :
بمنتهى البساطه بتطرح 100 من طولك بالسنتي متر وتضرب ناتج الطرح في 1.5

مثلا :
واحد طوله 180 سنتيمتر
يبقى 180-100 = 80* 1.5 = 120 كيلوجرام
اذن الشخص اللي طوله 180 سنتيمتر لازم يبقى وزنه اكتر من 120 كجم عشان يعتبر وزن زائد وميدخلش الجيش لهذا السبب

مثال اخر :
واحد طوله 160 سنتيمتر
يبقى 160-100=60*1.5= 90 كيلوجرام
اذن الشخص اللي طوله 160 سنتيمتر لازم يبقى وزنه اكتر من 90 كجم عشان يعتبر وزن زائد وميدخلش الجيش لهذا السبب

-------------------------------------------------------------------------------------------------------------------


ثانياً : حالات الاستثناء من أداء الخدمه العسكريه (او التجنيد) والمستندات المطلوبه كالتالي :

1) المعينون برتبه ضابط للخدمه في القوات المسلحه أو الشرطة أو في احدى الهيئات الحكوميه ذات النظام العسكري
المستندات المطلوبه :
النموذج 6 جند من شئون الضباط

2) المتمتعون بجنسيه ج م ع الذين أدوا فعلا الخدمة العسكريه في جيش دوله اجنبيه وأقاموا الاقامه عاديه
المستندات المطلوبه :
النموذج 6 جند + شهاده بأداء الخدمة العسكريه في جيش الدوله الاجنبيه

3) طلبه الكليات والمعاهد العسكريه المعده لتخريج ضباط القوات المسلحه أو الشرطة والمصالح والهيئات الحكوميه ذات النظام العسكري حتى تخرجهم
المستندات المطلوبه :
نموذج 8 جند مدموغ يعتمد من الكليه أو المعهد

4) الفئات التي يصدر بقواعد وشروط استثنائها قرار من وزير الدفاع - مكتسب الجنسيه الاجنبيه - مكتسب الجنسيه المصريه - مقتضيات المصلحه العامه - معتادي اجرام
المستندات المطلوبه:
بيان مصلحه وثائق السفر والهجرة والجنسيه يفيد صدور قرار وزير الداخليه بالموافقه على حمله الجنسيه المصريه.
+ نموذج 6 جند مدموغ ( مستوفي البيانات ) للحصول على شهاده الاستثناء

-------------------------------------------------------------------------------------------------------------------



ثالثاً : ايه هو الفلات فوت ؟
الفلات فوت :
ترجمتها الى اللغه العربيه هي القدم المسطحه
بمعنى ان القدم العاديه يكون اسفل جزء منها ( قعر القدم ) ليس مستوي ( بل يكون على شكل قوس )
وذلك حتى نستطيع ان نقف فترة طويله بدون تعب
بينما الشخص الذي عنده فلات فوت يتعب عندما يقف ثابت على قدمه لفترة طويله نوعا ما

الفلات فوت العظمي :
يكون قعر القدم مستوي ومسطح تماما حتى اذا لم يقف على الارض وبالتالي فانه يتعب فعلا عند الوقوف ثابت
وهذا الشخص يأخد اعفاء طبي من الجيش لأنه لن يستطيع ان يقف فترة طويله ثابتا على قدمه

الفلات فوت اللحمي :
يكون قعر القدم ليس مستوي بل يكون على شكل قوس
لكن عند الوقوف على الارض فان قعر القدم يصبح مسطح تماما موازي للارض
وهذا الشخص لن يأخد اعفاء طبي من التجنيد المصري

-------------------------------------------------------------------------------------------------------------------



رابعاً : حالات الاعفاء النهائي من الخدمه العسكريه
1- عدم اللياقه الطبيه لأداء الخدمة العسكريه والوطنيه
2- الابن الوحيد لأبيه المتوفي
3-الابن الوحيد لأبيه الغير قادر على الكسب نهائيا
4- اكبر المستحقين للتجنيد من اخوة أو أبناء المواطن الذي استشهد أو أصيب باصابه تعجزه نهائيا عن الكسب بسبب العمليات الحربيه
5- أكبر المستحقين للتجنيد من أخوة أو أبناء الضابط أو المجند أو المتطوع الذي يتوفى بسبب الخدمه التي أعجزته نهائيا عن الكسب

-------------------------------------------------------------------------------------------------------------------



خامساً : حالات الاعفاء المؤقت من الخدمه العسكريه
1- الابن الوحيد لأبيه الحي
2- العائل الوحيد لأبيه الغير قادر على الكسب وكذا العائل لأخيه أو لأخوته الغير قادرين على الكسب
3- العائل الوحيد لأمه الأرمله أو المطلقه اطلاقا بائنا أو كان زوجها غير قادر على الكسب
4- أكبر المستحقين للتجنيد من أخوة الضابط أو المجند أو المواطن الذي فقد بسبب العمليات الحربيه ويعامل الغائب في العمليات الحربيه معامله المفقود الى ان يتضح موقفه

-------------------------------------------------------------------------------------------------------------------



سادساً : الاوراق المطلوبه عند التقدم للجيش
1- شهاده ميلاد كمبيوتر وحقولكم بتتعمل ازاي في احد المواضيع الموجوده في المدونه
2- بطاقه 6 جند اللي كنا سلمناها للكليه
3- فيش جنائي عشان الجيش ولازم يكون عشان الجيش مش لأي سبب تاني
4- قيد عائلية وممكن استخدام الوصل مختوم لو ملحقش يطلع
و خللي بالكم عشان الناس اللي بتحتاج تعمل القيد العائلي هما بس اللي يعتبروا لائق أو حيدخلوا ظباط أو اللي كانوا عندهم اعفاء سواء مثلا اذا كان وحيد او ابوه متوفي وهو العائل الوحيد للاسره
5- عدد 4 صور شخصيه على الاقل ويا ريت يكون عندكم اكتر احتياطي
6- نموذج 40 اللي بتجيبوه من البوسطه ويا ريت تحاولوا تجيبوه من بدري عشان للاسف النموذج ده بيخلص بسرعه في معظم البوسطه وساعتها حتضطر تلف الدنيا عشان تلاقيه والنموذج ده هو اللي بتملاه عشان تعرف تعملالقيد العائلي
7- افاده من الكليه او شهاده مؤقته عشان تثبت بيها انك مؤهل عالي وتثبتلهم انك اتخرجت من كليه كذا
8- طبعا البطاقه الشخصيه ودي مفيهاش كلام
9- لو كان عندك اخ اصغراو اخت صغيره ومعندهومش بطاقه شخصيه يبقى لازم تعملهم شهاده ميلاد كمبيوتر عشان حتحتاج الرقم القومي بتاعه عشانالقيد العائلي
10- صور البطاقات الشخصيه للعائله كلهاااا الاب والام والاخوات والاخوه
11- صورة من عقد زواج الوالد والوالده عشان القيد العائلي وغالبا حتحتاج الاصل عشان توريه بس للموظفه
12- تحليل فصيله دم من مستشفى حكومي او خاص او حتى معمل تحاليل بس المهم يكون عليه ختم المكان اللي عملت فيه التحليل
13- لو افترضنا لا قدر الله ان الوالد متوفي يبقى في الحاله دي حتحتاج تطلع له شهاده وفاه كمبيوتر من اي مكتب خدمات جماهيريه

-------------------------------------------------------------------------------------------------------------------



سابعاً : باقي اجراءات التجنيد
بعد ما طلعتم القيد العائلي ( او الوصل مختوم ) والفيش الجنائي وشهاده الميلاد الكمبيوتر يبقى فاضلكم حاجات سهله خالص في اجراءات التجنيد
فاضلكم تجيبوا :
الشهاده المؤقته او افاده من الكليه
نموذج 6 جند اللي كنتم طلعتوه من مده واديتوه للكليه
تحليل فصيله دم
صورة بطاقتك
3 صور شخصيه

وحتديهم للعسكري الموجود في جزء التجنيد وساعتها هو بيراجعهم عشان يتأكد ان كل الاوراق مظبوطه وكامله وحيديكم استمارة الفيش الرباعي اللي انتم برضة حتودوه عند النقطه اللي عملتوا فيها الفيش الجنائي وحتبصموا برضة على الفيش الرباعي ( عباره عن 3 ورقات في كل ورقه صورة شخصيه ليك ) وهيسلمهولك وانت واقف
وبعد كده حترجع تاني للقسم عشان تخللي واحد اسمه شيخ الحارة يمضي على الفيش الرباعي وبعد كده حتروحوا لمدير القسم عشان يختمهولكم
وبعد كده هتودوه تاني لجزء التجنيد والعسكري حيقولكم تعالوا اما بكرة او في نفس اليوم متأخر عشان تاخدوا كل اوراقكم اللي كنتم اديتوهومله ويقولكم تعالوا يوم كذا ( يوم الكشف الطبي ) حالق ذقنك وشعرك ومعاك طبعا كل اوراقك وبكده تبقى انت خلصت الاوراق المطلوب احضارها لمنطقه التجنيد وخلصت اخيرا كل اجراءات التجنيد

-------------------------------------------------------------------------------------------------------------------


[size=32]هانتكلم في المشاركه دي عن الكشف الطبي
[/size]ياريت لو فيه بنات بتقرأ بلاش تقرأوا المشاركه التانيه دي
لأن فيها كلام مش كويس أنك تقرأيه
( اللهم بلغت اللهم فأشهد )

-------------------------------------------------------------------------------------------------------------------

الكشف الأول : كشف العظام

بمنتهى البساطه الدكتور بيقولك اقف وانت ضامم رجليك على بعض ( عشان يشوف لو عندك فلات فوت عظمي , مش لحمي زي ما قلنا ) او اذا كان عندك التصاق في الفخذين او اذا كانت المفاصل والركبه كويسين ولا فيهم مشكله ما
وانت برضة حتكون فارد كفين ايديك للامام عشان برضة يشوف لو في اي مشكله في ايدك ولا مفيش
وطبعا حيسألك اذا كان عندك كسر قديم ولا شرخ او اي حاجه متعلقه بالعظام ( وبالمناسبه لو عندك عدم تطابق الفكين بحيث ان الفك السفلي موجود للامام عن الفك السفلي ابقى قوله عليها ومتخافش )
ولو عندك اي مشكله حيعمل اعاده فحص اما في نفس اليوم او يوم تاني او وقت اللجنه الطبيه العليا


الكشف الثاني : كشف الرمد
طبعا الدكتور حيخليك ( بعد ما تقلع النظارة لو انت كنت بتلبس نظارة اساسا )تبص على العلامات الغبيه ويقولك فتحه الرمز رايحه ناحيه ايه؟ اليمين ولا الشمال ولا فوق ولا تحت ولا ايه ؟
طيب افرض انت مشوفتهمش فعلا
والكشف الطبي ده بالذااااااااااااااااااات لمصلحتك الشخصيه متحاولش تستعبط فيه وتعمل نفسك مش شايف
عشان ساعتها حيحولك لاعاده فحص بعد ما تحط قطرة بشعه بتوسع حدقه العين حتخلي عينك تفضل مفتحه غصب عنها للاسف لمده طويله حوالي 10 ساعات ومش حيبقى عندك احساس بالابعاد كويس طول الفترة دي
يعني الحاجه القريبه ممكن تشوفها بعيده والعكس
وطبعا التأثير المنيل بتاعها بيروح بعد حوالي 10 ساعات لمده يوم تقريبا
المهم بعد ما انت حطيت القطرة البشعه دي حتعمل كشف طبي تاني وتحاول تشوف العلامات ولو نظرك ضعيف يا ريت ساعتها تبقى تجيب اي حاجه تثبت كده


الكشف الثالث : كشف القلب
سهل جدا : الدكتور حيقيس نبض قلبك وضغطك ولو لقى ضغطك عالي جامد ساعتها حيقولك تيجي تفحص تاني في يوم تاني او في لجنه طبيه عليا


الكشف الرابع والأخير :كشف الجراحه
تحذير للمرة الأخيرة لو فيه بنات بلاش تكمل الجزء ده
معلومه بس احب أأكدها وهي ان الدكتور مش حيستعمل ايده اساسااااااا (يعني الشائعات المخيفه اللي كان الواحد بيسمعها غلط تماااااااااما ) والكشف ده مش حياخد اكتر من 10 ثواني بالكتير
بص انت اول ما حتدخل على الدكتور حتقلع الشورت اللي كنت لابسه وبرغم اني عارف انه شئ منيل بس الكلام ده حيحصل عليك وعلى كل الموجودين وده تأكد منه مليوووووووون في الميه فياريت عشان تريح نفسك اوعى وبكررها تاني اوعى تمايع الدكتور او تقوله بلاش او بتكسف او اي حاجه عشان من الاخر طالما دخلتله هو كده كده حيكشف عليك
الشئ الوحيد اللي حتستفيده من مماطله الدكتور انه هيشك فيك وحيفتكرك لا مؤاخذه مش راجل يعني شاذ وبالتالي معاملته حتبقى وحشه جداااااا يعني ساعتها ممكن يقولك الفاظ قبيحه او اي شئ
الملخص لكلامي متحاولش تماطل الكتور عشان الكشف الطبي الزفت ده يخلص في 5 ثواني وخلاص فاهمني ؟
طبعا بعد ما تقلع الكتور حينظر الى الخصيه ( بعينه بس من غير ما يلمسها حتى ) وبعدها حيقولك اتدور ووطي ( كأنك راكع ومديه ظهرك ) وحينظر الى فتحه الشرج ( وده للاسف هي الوسيله المتبعه عشان يكتشف بيها اذا كنت مستقيم ولا شاذ ؟ وكمان عشان يعرف اذا كان عندك ناصور ولا لأ ؟ )
لو عملت ده الكشف الطبي الزفت ده حيخلص في 5 ثواني وحتتعامل باحترام نسبي على الاقل
وبعد كده حتلبس الشورت وتطلع بره وحتروحوا على حجرة وحيعدي عليكم الدكتور العقيد وحيسألكم اذا كان اي حد عنده مشكله او حاسس انه اخد لائق في الكشف الطبي وهو مظلوم مثلا ولا لأ
وبعد كده حتلبسوا هدومكم كلها وحتستنوا ما يسمى بنموذج 110 وده اللي بيكون مكتوب فيه معاد الارجه بتاعك ( ولازم تحافظ عليه كويس جدا وتصوره احتياطي كذا نسخه )
وطبعا لو انت حتضطر تكشف تاني يبقى حتروح ولما تكشف تاني يبقى ساعتها حتاخد النموذج 110
ولو انت حتتحول للجنه طبيه عليا في القاهرة ( الكشف الطبي في حلميه الزيتون ) يبقى هتدي بطاقتك للعسكري المسؤول ولما تاخد النموذج 110 هتديهوله يختمهولك وبعدها حتروح لمكتب الامن اللي على البوابه وحتبصم عليه بصوابعك وتاخده وتروح وتيجي تاني في يوم الارجه ( يوم الارجاء ) وتشوف لو اخدت تأجيل يبقى خلاص مبروك عليك انما لو لبست لا قدر الله يبقى حتضطر تروح تكشف تاني في القاهرة في حلميه الزيتون

-------------------------------------------------------------------------------------------------------------------



اجراءات الاعفاء يوم الكشف الطبي
لو انت كنت سعيد الحظ يوم الكشف الطبي في التجنيد يبقى حتاخداعفاء ان شاء الله وده ممكن يكون بسبب وزن زائد أو ناصور أو بسبب ضعف النظر بدرجه كبيرة او اسباب كتير
المهم لو انت في نفس اليوم بتاع الكشف الطبي اخدت اعفاء وكنت غير لائق حتعمل ايه ؟
لازم يكون معاك صورة شخصيه + صورة من البطاقه الشخصيه
بعد ما تكشف حتروح انت وكل الناس اللي زيك لقائد المنطقه العسكريه ( منطقه التجنيد ) وحيكشف عليكم تاني للتأكد من ان اول تشخيص طبي كان صحيح وانك فعلا لك عذر طبي تستحق عليه الحصول على اعفاء طبي
لو انت فعلا كان عذرك الطبي صحيح ففي تلك الحاله :
حتبصم بالحبر على الورق مرتين ده غير انك حتبصم الكتروني على الكمبيوتر والكمبيوتر حيشوف بياناتك من خلال بصمتك
وبعدها باسبوع يا بطل حتروح تستلم شهاده الاعفاء بتاعتك من التجنيد
وبكده يبقى الف مبرووووووك و صدقني كل التعب اللي تعبته في اجراءات التجنيد أو الكشف الطبي لا يساوي شئ بالنسبه للتعب اللي كنت ممكن تتعبه في الجيش




-------------------------------------------------------------------------------------------------------------------




ملحوظات مهمه بخصوص الكشف الطبي
1- هنالك بعض الحالات في الكشف الطبي التي تستدعي اما اعاده الفحص او انزال الشخص الى لائق ب او حتى اعطائه اعفاء طبي
من أمثله تلك الحالات الطبيه :
أ- ضعف النظر
ب- حمى البحر المتوسط
ج- فلات فوت عظمي
د- مرض السكر
م- الالتهاب الكبدي الوبائي سي ( فيروس سي )
و- وجود كسور او شروخ كبيرة في العظام
ن- التصاق الفخذين
ل- الوزن الزائد
ر- قصر القامه او ان يكون الشخص قصير ( اقل من 160 سنتيمتر )
غ- ضغط الدم المرتفع
ق- مشاكل في الجهاز التنفسي او ما يسمى ب الازمه
س-مشاكل جلديه او وشمه غريبه او ما شابه
ش - عدم تطابق الفكين ( تسمى كلاس ثري) بحيث ان الفك السفلي مستواه الطبيعي امام الفك العلوي
ض- وجود ناصور

هذه هي الحالات المرضيه التي اتذكرها والتي لها دلاله في الكشف الطبي في الجيش سواء الكشف الطبي في التجنيد او الكشف الطبي في حلميه الزيتون و لكن ليس شرط ان تكون هذه الحالات هي كل الحالات المرضيه التي لها علاقه بالكشف الطبي
كما انبه مرة اخرى انه ليس معنى ان تكون عندك حاله مرضيه من تلك الحالات انك ستأخذ اعفاء طبي فربما تنزل لعسكري ( لائق ب ) فقط
اي ان الموضوع اولا وأخيرا في الكشف الطبي يعتمد على حالتك المرضيه

2- ملحوظه مهمه :
لمزيد من الشفافية يقوم قائد منطقه التجنيد بإخراج عدد من الاشخاص "10%من عدد المعافين نهائيا" وتوجيههم لإعادة الكشف الطبي مرة أخرى بالمجلس الطبي العسكري بالقاهرة ( الكشف الطبي في حلميه الزيتون ) وذلك حتى يكونوا متأكدين تماما ان كل هؤلاء الاشخاص يستحقون فعليا الحصول على اعفاء طبي


-------------------------------------------------------------------------------------------------------------------



نصائح هاااااامه جدا للكشف الطبي
1- تروحوا بدري جدا لمنطقه التجنيد ( عشان تخلصوا بدري نوعا ما وعشان حاجه تانيه كمان ) يعني على الساعه 7 الا ربع ( واساسا المفروض تكونوا هناك رسميا الساعه 7 صباحا )
2- تكونوا مصورين كل الورق اللي معاكم ايا كان على الاقل نسخه واحده وتكونوا اخدينها معاكم عشان لو فيه اي ورق ضاع منكم لا قدر الله تعرفوا تتصرفوا وتستعملوا الصورة
3- اساسا مطلوب منكم تكونوا مصورين الفيش الجنائي ( مش الرباعي ) +شهاده الميلاد الكمبيوتر + الافاده ( او الشهاده المؤقته ) + استماره 6 جند + القيد العائلي او الوصل المختوم كل الكلام ده 5 نسخ ( ده بالاضافه للنسخه المتصورة من كل ورقك اللي قلتلك عليها في رقم 2 )
4- جايب قلم ازرق جاف ضروري + يفضل عشان تنجز نفسك تجيب بردك لو عندك دباسه صغيرة والبتاعه اللي بتشيل الدبابيس
5- جايب دوسيه او اكلاسير عشان ده اللي حتحط فيه الاوراق المطلوبه وتسلمهولهم وده ضروري جداااااااااا ( من غيره مش حيستلموا الورق )
6- طبعا جاي حالق شعرك جامد ( يعني تروح للحلاق وتقوله عايزها حلاقه ميري ودي تقريبا درجه 2 او 3 ) واهم حاجه ذقنك تكون متشاله تمااااااااااما بالموس ( مش حتى بالمكنه )
7- لو عندك كاب او طاقيه يا ريت تجيبه لمصلحتك عشان لما تقف في الشمس متجيلكش ضربه شمس ( وهو مسموح بيه على فكرة )
9- تجيب شنطه عشان دي اللي حتشيلها وتحط فيها اوراقك والميه والاكل ( وطبعا كل ده مسموح بيه مفيهاش مشكله ) وكمان الشنطه دي هي اللي حتحط فيها هدومك لما تضطر تقلعها
10- طبعا بطاقتك الشخصيه شئ اساسي ويا ريت تكون مصورها كام مرة احتياطي
11- كام صورة شخصيه ليك عشان ممكن يطلبوها لو انت حتاخد اعفاء طبي في نفس يوم الكشف الطبي
12- فلوس بسيطه عشان حتدفع فلوس عشان تاخد بون التصوير ( ولو انت كنت مصور كل حاجه زي ما قولتلك يبقى حتدفع جنيه واحد بس انما لو ورقك مش كامل تصوير يبقى حتدفع اكتر تقريبا 5 جنيه ) وكمان فلوس المواصلات

طبعا انا مخليكم تصوروا يمكن زياده شويه لكن ده احتياطي لمصلحتكم ( مطلوب مننا نصور 4 نسخ من 3 حاجات من الاوراق المطلوبه و5 نسخه من الحاجه الرابعه بس بصراحه مش فاكر انهي كانوا محتاجين 4 صور منها وانهي كانوا محتاجين 5 عشان كده يا ريت تصوروا 5 نسخ من الورق اللي قولتلكم عليه عشان تريحوا نفسكم )



-------------------------------------------------------------------------------------------------------------------





تابع نصائح مهمه للكشف الطبي
طبعا انت قبل ما هتدي الدكتور الورقه اللي فيها الرسم الكروكي بتاع بيتك انت وكل زمايلك هتقلعوا كل هدومكم ما عدا الشورت او الشورت الابيض او البوكسر وهتدخلوا على كل كل كشف واحد واحد ورا بعض وبين كل حجرة وحجرة ستاره بتفصل كل كشف عن التاني
في كل كشف الدكتور بيسألك اذا كنت بتشتكي من مشكله معينه ليها علاقه بالكشف اللي انت داخله
يعني مثلا في كشف العظام الدكتور حيسألك اذا كنت مركب مسامير او عندك فقرات او مفاصل او عظام مكسورة او فيها شرخ مثلا وكده يعني

اهم حاجه عشان تبقوا فاهمين :
من مصلحتك ومن مصلحه الدكتور نفسه انك لو بتشتكي من اي حاجه بكرر اي حاجه اي حاجه ليها علاقه ولو حتى بعيده بالكشف ساعتها انت بتقوله عليها وهو اللي يحكم اذا كان الشئ اللي عندك يستحق يخليك تعمل فحص تاني او ينزلك عسكري من ظابط او تاخد اعفاء حتى

طيب ليه من مصلحته انك تقوله كل حاجه ؟
اقولكم انا :
عشان بمنتهى البساطه الكشف اللي انت بتكشفه اسمه كشف مبدأي او كشف أولي بمعنى انه مش هو الكشف النهائي يمعنى ادق الدكتور لما بيكون شاكك انك عندك حاجه احتمال تطلعك من الجيش او حتى تخليك لائق ب ( يعني عسكري ) ساعتها في ملفك الطبي بيكتب غير لائق او محتاج فحص يعني لو هو كتبلك محتاج فحص يبقى انت كده مش اخدت اعفاء لكن ده معناه انك حتكشف تاني اما في نفس اليوم او بعدها في يوم تاني او حتى في لجنه طبيه عليا في القاهرة ( الكشف الطبي في حلميه الزيتون )
اللي عايز اوصلهولكم ان الناس اللي كانت بتاخد اعفاء طبي في نفس يوم الكشف الطبي هما بس اللي كانوا بياخدوا اعفاء عشان وزن زائد او موضوع عرض الصدر لكن اي حد تاني بيتكتبله انه يفحص تاني وساعتها يياخد اعفاء او لائق ب او ممكن يكمل حتى لائق أ ( يعني ظابط وده في حاله انه عذره الطبي غير مقبول ولن يؤثر على تجنيده )
والدكتور من مصلجته انه لو شاكك في اي حاجه انه يكتبلك فحص تاني والناس المتخصصه هما اللي بيحددوا بمعنى ادق هو بيشيل ايده عشان ميتحطش في مشكله طيب ليه ؟ عشان انت بعد ما بتخلص كل الكشوفات خااااالص بييجي عقيد دكتور وبيسألكم حد بيشتكي من حاجه ؟ حد حاسس انه اتظلم في الكشف ؟حد حاسس انه كان المفروض ياخد اعفاء طبي واتظلم واتكتبله لائق ؟
لو انت مظلوم وقولتله على اللي عندك وكان عذرك فعلا يستحق انك تاخد اعفاء بينما الدكتور اللي كشف عليك اول مرة مأخدش باله او مهتمش ساعتها الدكتور العقيد حيزعقله والله اعلم اذا كان فيه عقاب بسيط ليه ولا لأ فاهمني ؟
طيب في ناس حتستعبط لا مؤاخذه وحتتحايل على اول دكتور حيكشف عليك وتقوله اكتبلي فحص ساعتها الدكتور ده حيبهدلهم
ليه؟
عشان هو اساسا بردك الدكتور العقيد حيعاقبه لو لقاه محول ناس كتير من غير ما يستحقوا للفحص الطبي الثاني ابسطها ده معناه انه مش فاهم شغله او مكوسها معاهم وطبعا ده غير مقبول اطلاقا في التجنيد المصري
طيب ايه الحل ؟
بمنتهى البساطه اولا تروح بدري وتكون مكمل ورقك وتكون من اول ناس بتكشف ( يعني اول مجموعه ) عشان ساعتها الدكاترة بيبقوا رايقييييييين جدا وانت لو عندك اي حاجه بتقولهم عليها و اهم حاجه تتكلم باحترام ومن غير دلع وتكلم كل دكتور في تخصصه يعني متقولش لبتاع العظم انا نظري ضعيف مثلا فاهمني ؟ والدكتور لما بيلاقيك بتتكلم باحترام ومن غير استعباط ساعتها على الاقل حيحترمك وهو اللي حيقولك اذا كان عذرك ليه دلاله ولا لأ
عشان حط نفسك انت مكان الدكتور لما انت تروحله متأخر بعد ما يكون كشف على ناس كتيييييييير فيه منهم اغبياء وناس كانت بتستعبط وكل واحد يقوله انا عندي كذا وكذا وناقص يقولوله انا عندي تسلخات ومش حينفع اخش الجيش
فبالتالي الدكتور على بال ما انت جاي تقوله اللي عندك حيكون اساسا مخنوق من الناس اللي قبلك وممكن يفتكرك انت كمان بتستعبط ( مع ان انت ممكن يكون سؤالك برئ فعلا ) وعشان كده انا ركزت قوي واكدت عليكم لمصلحتكم ان انتم تكونوا من اول ناس بتكشف عشان تتعاملوا باحترام وكمان فرصتكم انكم تدردشوا مع الدكاترة وتقولولهم اللي عندكم اكتر

وممكن من لاشئ تطلع حاجه انت كنت فاكرها بسيطه ومالهاش اي علاقه بالجيش تكون الحاجه دي هي السبب في طلوعك من الجيش وده حصل فعلا لناس كتيييييييييييير



كده خلصنا جزء الكشف الطبي

----------------------------------------------------------------



في المشاركه دي هانتكلم عن مابعد تحديد الموقف من الجيش
يعني أوراق او مستندات أو إجراءات محتاجها للسفر أو لأي شئ
-------------------------------------------------------------------------------------------------------------------

إذن السفر للخارج
اي شخص حاصل على اعفاء مؤقت أو طالب أو تأجيل ومكتوب في الشهاده اللي معاه انه غير مصرح له بالسفر الا بإذن ممكن ياخد اذن من منطقه التجنيد التابع ليها بمنتهى السهوله وبياخدها في نفس اليوم كمان
الاوراق المطلوبه للحصول على إذن السفر بالخارج :
1- عدد 2 صورة من الباسبور
2- صورة واحده من التأشيره
3- صورة واحده من البطاقه
4- صورة واحده من شهاده الموقف التجنيدي سواء اعفاء مؤقت أو تأجيل
5- بون اسمه بون اذونات سفر للخارج بتجيبه من داخل منطقه التجنيد بجوار مكتب الحصول على إذن بالسفر للخارج وقيمه البون بتختلف حسب السنه اللي اتولدت فيها بس السعر بيتراوح من 15 جنيه لحد 40 جنيه بالكتير أوي
6- يفضل لو معاك أصل لشهاده موقفك التجنيدي احتياطي فقط لا غير لكن مش ضروري أوي

اما بالنسبه للطلبه :
الاوراق المطلوبه للحصول على إذن السفر بالخارج في اجازة نصف العام أو اجازة أخر العام الدراسي :
1- عدد 2 صورة من الباسبور
2- صورة واحده من التأشيره
3- صورة واحده من البطاقه
4- شهادة قيد من الكليه أو المعهد اللي بتدرس فيه
5- بون اسمه بون اذونات سفر للخارج بتجيبه من داخل منطقه التجنيد بجوار مكتب الحصول على إذن بالسفر للخارج وقيمه البون بتختلف حسب السنه اللي اتولدت فيها بس السعر بيتراوح من 15 جنيه لحد 40 جنيه بالكتير أوي

ملحوظه صغيره :
الشخص الذي أدى الخدمه العسكريه يحتاج تصريح بالسفر للخارج لكن الشخص الذي لديه تأجيل أو اعفاء مؤقت سيحتاج الى إذن للسفر للخارج

الخطوات المطلوبه للحصول على اذن السفر للخارج :
بمنتهى البساطه بتروح الاول بتسأل داخل منطقه التجنيد على الشباك بتاع اذن السفر للخارج حتلاقيه وحتلاقي جنبه الشباك بتاع الخزنه اللي حتجيب منه بون اذونات السفر للخارج
روح الأول لشباك الخزنه واشتري منه بون اذونات السفر للخارج وحتلاقيه حيديك بون للتصوير كمان عشان لو احتجت تصور اي ورق سواء الباسبور او البطاقه اوالتأشيره مسموحلك بالبون ده تصور من غير فلوس في ماكنه التصوير الموجوده بمنطقه التجنيد
المهم بعد ما حيكون معاك البون والصور من الورق المطلوب روح لشباك اذن السفر للخارج واديه للموظف او الموظفه الموجوده حتقولك استريح شويه وحتنادي على اسمك في ربع ساعه بالكتير ومبروك عليك إذن السفر بالخارج
-------------------------------------------------------------------------------------------------------------------



بدل فاقد لأصل شهادة التجنيد


لو ضاعت منك شهادة التجنيد سواء كانت شهاده الاعفاء المؤقت او شهاده التأجيل او حتى اصل الشهاده كان في شغلك وكنت محتاج اصل الشهاده بسرعه وفي الشغل مش حيرضوا يدوهالك بسرعه فممكن بمنتهى السهوله تروح منطقه التجنيد التابع ليها وتطلع بدل فاقد لشهاده التجنيد

الاوراق المطلوبه للحصول على بدل فاقد لشهاده التجنيد :
1- صورة من شهادة التجنيد بتاعتك
2- بون اسمه بون بدل فاقد وده سعره بيتراوح من 15 جنيه ل 30 جنيه
3- قلم ازرق

الخطوات المطلوبه للحصول على بدل فاقد لشهاده التجنيد :
حتسأل اي عسكري في منطقه التجنيد على مكان استخراج بدل فاقد لشهادة التجنيد ( المكان ده حيكون شباك اسمه مكتب مراجعة لمحافظتك )
حتلاقي جنب المكتب ده شباك الخزنه اللي حتجيب منه بون بدل فاقد وحيديك استماره لونها اصفر حتملأ بيانات الخانه الاولى منها فوق بس وهو حتلاقيه كله عن بطاقتك مكان استخرجها ورقمها وتاريخ صدورها واسمك طبعا بس كده ومتملأش الحاجات التانيه اللي بتكون مكتوبه تحت
وبعد كده بتروح الشباك اللي مكتوب عليه مكتب المراجعه وحتديه البون والاستماره الصفراء وصورة شهادة التجنيد وهو حيديك وصل عشان تستلم بيه بدل فاقد لأصل شهادة التجنيد وغالبا حيقولك تعالى بكره او ممكن كمان في نفس اليوم لو كنت جيتله بدري اوي الصبح
بس كدا بعدها عند نفس الشباك او احيانا عند الشباك اللي بره خاالص منطقه التجنيد حتاخد بدل فاقد لشهاده التجنيد


-------------------------------------------------------------------------------------------------------------------

منقول للفائدة


استعرض الموضوع السابقالرجوع الى أعلى الصفحةاستعرض الموضوع التالي
صلاحيات هذا المنتدى:
لاتستطيع الرد على المواضيع في هذا المنتدى

«الموضوع السابق|الموضوع التالي»