قائمة المنشورات


 ابعت مشكلتك


 العودة إلى المنتدى

منتدى فتوك للرجال فقط    

شركة الوكيل للصيانة والتوكيلات التجارية - المعادى

مشكلتى | منشور الأربعاء 31 يناير 2018, 1:43 pm

الميكروويف بتاعى نوعه دايو عطل امبارح ومابقاش يسخن .. دورت على النت وجبت تليفون شركة اسمها الوكيل للصيانة والتوكيلات التجارية وكلمتهم .. المهم جالى اتنين مندوبين كشفوا على الجهاز وقالولى وحدة التسخين باظت ووحدة تانية مش فاكر اسمها باظت والجهاز لازم يروح الشركة وهيتكلف ١٢٥٠ جنيه .. طبعا رفضت لان المبلغ ضخم واضطريت ادفع رسوم كشف قدرها ١٠٠ جنيه وادانى ايصال (الايصال مرفق) .. لا وكمان عرض عليا يشترى الجهاز بحالته بسعر ٥٠٠ جنيه فقلتله هافكر واتصل بيه.
المهم بواب العمارة قالى على واحد كويس بيصلح الميكروويف فى صقر قريش فاخدته ورحنا مع بعض .. الراجل فتح الجهاز وكشف عليه وقالى فيه فيوز عايز يتغير وفعلا غيره واخد ٥٠ جنيه فقط لا غير والجهاز اشتغل زى الفل ولله الحمد.
الواضح بقى ان الشركة دى بتنصب على العملاء واسلوبها فى النصب انها تبعت الفنيين للعملاء ويقولولهم على اعطال مش موجودة ولو الزبون وافق يبقوا نصبوا عليه نصباية كبيرة ولو ماوافقش يبقى اخدوا منه ١٠٠ جنيه ونصبوا عليه نصباية صغيرة.
النهاردة الصبح طلعت فى دماغى اكلم الراجل واقوله ييجى يشترى الجهاز ولما ييجى ويجيب الفلوس اخد منه المية جنيه وارجعله الايصال وفعلا كلمته الصبح وقالى انه هيتصل بيا نحدد الميعاد .. بس للاسف المدام كلمت الشركة وقالتلهم على اللى حصل وطلبت منهم يرجعوا فلوس الكشف وطبعا الشركة رفضت وقالتلها ان رسوم الكشف مش بترجع .. ولما انا كلمت الراجل تانى ماردش عليا لانه عرف انى اكتشفت انهم نصابين.
علشان كدة حبيت احذركم من التعامل مع شركة الوكيل للصيانة والتوكيلات التجارية واى شركة تطلب رسوم كشف ويا ريت تشيروا البوست ده علشان نفضحهم ونحذر الناس منهم.

نبذة عن الكاتب